Оңтүстік Қазақстан облысы Ордабасы ауданында «Март» серіктестігі пияз кептіру цехын іске қосу үшін шаруа қожалықтарының басын біріктіріп жатыр деп хабарлайды «Egemen.Kz» тілшісі.

 

Цехтың құрал-жабдықтарын «Оңтүстік» Аймақтық инвестициялық орталығы арқылы лизингке сатып алмақ. Кәсіпорынның ерекшелігі – нарықта сұранысқа ие болмауы салдарынан қалдыққа айналған, даладан жинап алуға да жарамай қалған өнімдерді кептірумен айналысуында.

Енді диқандар пияздарын нарыққа шығарумен қоса, олардың жарамайтындарын «Март» ЖШС-не жеткізіп беру арқылы, қалдықсыз әрі қосымша пайдамен жұмыс істеу мүмкіндігіне ие болады. Оған қоса, шаруалардың бірігіп жұмыс жасауының арқасында кооператив құрылып, кіші шаруа қожалықтары ірі кәсіпорынға айналады.

Дихандармен кездескен «ОҢТҮСТІК» АИО Басқарма басшысының орынбасары Дәулет Мамыров кооператив арқылы біріге жұмыс жасаған шаруаларға мемлекет тарапынан көптеген жеңілдіктер мен несие алудың жолдарын түсіндіріп берді. «Кооперативтерді қаржыландыру бізде басым бағыт ретінде қаралып отыр. Егер бірігуге ниетті шаруа қожалықтары болса, бізден кеңес алуына болады. Сондай-ақ біздің орталық бизнес жоспар әзірлеу, құжат жинау секілді маңызды шаруаларға қол ұшын бере алады»,- деді Дәулет Мамыров.

Бақтияр Тайжан,

«Егемен Қазақстан».

Оңтүстік Қазақстан облысы

https://egemen.kz/article/oqo-da-piyaz-keptiru-tsekhy-iske-qosylady